DAVAO CITY – Nahunong ang dagan sa mga sakyanan sa sulod sa halos usa ka oras sa Quirino ug Magallanes Avenue human nga nagpahigayon ug lightning rally ang gibana-bana nga mokabat ngadto sa duha ka gatus ka mga sakop sa New People’s Army (NPA).
Nanagsul-ob ang mga suspek ug maskara nga nawong sa patay na nga si Kumander Parago (Leoncio Pitao sa tinuod nga kinabuhi) sa Pulang Bagani Command (PBC) 1.
Nagsugod ang pagbara sa dagan sa trapeko mga alas singko y media kaganinang buntag.
Gisinggit sa mga rebelde ang kalampusan nga ilang naangkon sa sulod sa 48 ka tuig mga pagpakigbisog batok ngadto sa kagamhanan.
Pinaka-ulahi niini mao ang kalampusan sa mga bag-ong pakigsangka.
Human masayri nga nagsingabot na ang mga patrol car sa City Transport and Traffic Management Office (CTTMO) gilayon nga miikyas ang mga protesters.
Usa ka daku nga tarpaulin ang gibilin sa grupo sa Bankerohan overpass nga nasulatan sa mga pulong Mabuhay ang CPP/ NPA 48th Anniversary Sampa na sa NPA.
Na-atol nga ang dapit nga gipahigayonan sa rally sa grupo dunay nakakabit nga Close Circuit TV Camera ug makita gayud sa Public Safety and Security Command Center (PSSCC) ang mga panghitabo mao nga gilayon nga naka-responde ang mga traffic enforcers.
Sa pakighinabi kang Capt. Rhyan Bachar, tigpamaba sa 10th ID Philippine Army iyang gipahayag nga gawasnon ang matag Pilipino nga makapahigayon ug mga paglihok basta wala lama’y katungod nga mayatakan, walay problema.
Nasubo lamang si Bachar gumikan kay sa sulod sa 48 ka mga katuigan nga panagsangka mga Filipino ang nangahimong pilde.
