DAVAO CITY – Napasakahan na sa City Prosecutor’s Office (CPO) ug kasong kidnapping ug estafa ang duruha ka mga Korean Nationals.
Sa gipagulang resolusyon ni Prosecutor Joy C. Bernales- Largo nga gi-aprubahan ni Prosecutor Shahruddin Roberto O. Cencio, aduna lig-on nga basehan aron nga pasakahan sila si Jeongpyo Hong ug Inryoul Park ug kasong kidnapping ug serious illegal detention human ang gidusong reklamo sa mga biktima nga sila si Nam Joung Nam ug Michell Anne Porras.
Subay sa reklamo ni Nam, gibihag sumala pa siya sa mga suspek kaniadtong Pebrero 15 ug 16 nila ni Hong ug Park ug nangayo ug P1 million nga ransom sa iyang pamilya bugto sa iyang kagawasan.
Apan kaniadtong Pebrero 16 sa hapon, nakahimo pag-ikyas ang nahisgutan pinaagi sa tabang sa iyang higala nga si Park Ui Jeung hinungdan nga nangayo sila ug pakitabang sa Criminal Investigation and Detection Group- Eastern Mindanao ug Criminal Investigation and Detection Unit (CIDG- Davao).
Nasayran nga si Hong ug Park ang naka-check in sa Chateau Veronica Apartelle sukad Pebrero 8 hangtud Pebrero 15 apan pakyas nga mabayran ang kantidad nga mobalor sa P18,180.
