DAVAO CITY – Walay natalang dagko nga insidente ang kapulisan sa dakbayan atol sa pagtapos sa ASEAN labor minister’s retreat meeting kagahapong adlawa.
Human ang nahisgutan nga tigom, nagpahigayon sab ug final inter-agency critics session ang mga hingtungdan nga ahensiya sa kagamhanan nga nahimong kabahin sa pagpatuman ug seguridad sa siyudad sukad nga gipahigayon ang launching sa ASEAN 2017 dinhi sa dakbayan.
Sa nahisgutan nga sesyon, nakadawat ug plaque of recognition ang pipila ka mga personahe gikan sa 21 ka mga ahensiya sa gobyerno diin gipangunahan ang pagtunol sa pasidungog sa mga opisyal gikan sa Police Regional Office (PRO) 11.
Nasayran sab nga tulo ka mga opisyal gikan sa kasundalohan ug kapulisan ang irekomenda sa PRO nga modawat ug awards sa PNP national headquarters sa kaulohan may kalabutan pa gihapon sa nahimong kontribusyon niini sa pagpatuman ug seguridad sa siyudad atol sa mga aktibidad sa ASEAN.
