DAVAO CITY – Gipanghimakak ni Pangulong Rodrigo Duterte ang alegasyon ni Senator Antonio Trillanes IV nga aduna kini P2 billion bank deposits sa iyang pangalan.
Gihimo sa pangulo ang pahayag sa Presidential guest house sa Panacan ning dakbayan sa Davao. Kahinumduman nga subling gibanhaw ni Senator Trillanes ang isyu nga pagbaton ug kapin P2 billion sa banko nga nakapangalan kang Pangulong Duterte.
Apan gitataw sa Pangulo nga kung mapatud-an man ni Sen. Trillanes ang iyang nahimong pahayag, andam gilayon sila nga mokanaug sa katungdanan.
Balik-balik na sab sumala pa ang maong isyu nga gibato kaniya kaniadtong mikandidato pa lamang siya pagkapangulo.
Dugang gibutyag sa Pangulo nga ang iyang asawa nga si Honeylet adunay salapi gumikan sumala pa sa negosyo niini sulod sa milabay nga mga katuigan samtang adunay gibilin sab nga katigayonan ang iyang mga ginikanan ngadto kaniya.
Gitawag sab sa Pangulong nga hanginon ug tulisan ang senador.
