Naapektuhan ang kapin 8.4 milyon ka indibidwal tungod sa Habagat ug mga bagyong Luis, Maymay ug Neneng, sumala sa National Disaster Risk Reduction and Management Council (NDRRMC).
Base sa NDRRMC, katugbang kini sa kapin 2.4 milyon ka pamilya gikan sa Zamboanga Peninsula, Central Luzon, National Capital Region, Ilocos Region, Cagayan Valley, Calabarzon, Mimaropa, Cordillera Administrative Region ug Bicol Region.
Anaa usab sa kapin 122,500 ka mga tawo ang kasamtangang nagpuyo sa mga evacuation center.
Nakatala ang NDRRMC og 32 ka namatay tungod sa epekto sa daotang panahon, diin kadaghanan niini gikan sa Benguet nga nalambigit sa mga pagdahili sa yuta.
Gibanabana nga miabot sa ₱6.16 bilyon ang kadaot sa imprastraktura ug agrikultura.
Samtang, mokabat sa ₱1.7 bilyon nga kantidad sa ayuda ang nahatag na sa gobyerno alang sa mga pamilyang naapektuhan.
Lakip sa mga lugar nga mipahibalo og state of calamity ang Benguet, Bataan, Bulacan, Pampanga, Zambales, Rizal, Cavite, Batangas ug Occidental Mindoro.
