Nagpabilin nga ubos ang porsyento sa mga Pilipino nga nagmalipayon sa ilahang kinabuhi mahitungod sa gugma.
Sumala sa survey nga gihimo sa Social Weather Stations o SWS, 46 porsyento lamang sa mga hamtong nga mga Pilipino ang nag-ingon nga malipayon kaayo sila sa ilang love life.
Sukad sa unang rekord niini niadtong 2004, kini na ang labing ubos nga porsyento sulod sa kapin 20 ka tuig.
Samtang 40 porsyento ang mitubag nga mahimo pa silang mas malipayon, ug 14 porsyento ang nag-ingon nga wala silay love life. Sa laing survey gihapon sa SWS, usa sa mga hinungdan nga nakaapekto sa problema sa love life sa mga Pilipino mao ang pagpanikas kon cheating.
Sumala pa nga miabot sa 27 porsyento sa populasyon ang naka-experyensya og lain-laing porma sa pagpanikas sama sa physical infidelity, emotional cheating, cybercheating, object cheating, financial cheating, ug micro-cheating.
Nasayran nga anaa sa 8 porsyento sa mga nabiktima ang nag-ingon nga naagian nila ang duha kon kapin pa ka matang sa pagpanikas.
Sa bahin sa kababayen-an, ang mga minyo maoy nagpakita sa labing taas nga lebel sa kalipay nga miabot sa 57 porsyento, gisundan sa mga adunay live-in partner sa 45 porsyento, samtang 22 porsyento lamang sa mga walay kapikas o bana ang nag-ingong malipayon sila.
Sa mga kalalakin-an, ang mga minyo gihapon ang labing malipayon sa 55 porsyento, gisundan sa mga adunay live-in partner sa 50 porsyento, ug 28 porsyento sa mga walay kapikas o asawa.
Ang maong survey gihimo gikan Nobyembre 24 hangtod 30, 2025 pinaagi sa face-to-face interviews sa 1,200 ka mga adult sa tibuok nasud.
