Posibleng masuspenso ang 40 ka power plants sa Visayas tungod sa kakulang sa aksyon taliwala sa padayong nipis nga suplay sa kuryente sa rehiyon, sumala ni Energy Secretary Sharon Garin.
Matod pa sa Department of Energy, una nang nag-isyu ang ahensya og 203 show-cause orders ngadto sa power generation companies sa tibuok nasod niadtong Hulyo tungod sa ilang kapakyasan sa pagsumite sa mandatory self-assessment reports.
Dugang pa, gitumong ang maong reports aron mamonitor ang kapasidad sa mga planta, kondisyon sa operasyon ug mga outage nga mahimong makaapekto sa suplay sa elektrisidad.
Sumala ni Garin, nahatagan na og warning ang mga kompanya ug ginaproseso na ang rekomendasyon sa suspension nga isumite ngadto sa Energy Regulatory Commission.
Wala gihinganli ang mga operator nga posibleng maapektuhan, apan giingong apil sa listahan ang pipila ka gagmay nga diesel plants.
Sa pagkakaron, padayon nga nakasinati ang Visayas og yellow ug usahay red alerts tungod sa kulang nga power reserves.
