Nagkanayon si Sen. Panfilo “Ping” Lacson nga ang 2025 national budget mao na ang ulahing spending plan nga adunay gitawag nga “leadership fund.”
Matud ni Lacson, giingong gipadagan kini nila kanhing DPWH Sec. Manuel Bonoan ug sa mitaliwang Undersecretary nga si Catalina Cabral.
Alang kang Lacson, sayop ang maong pamaagi tungod kay makahatag kini og higayon sa mga mambabalaod nga makapili og proyekto samtang anaa pa sa budget preparation stage, nga kinahanglan unta sakop sa Executive branch.
Gikumpara usab niya ang leadership fund sa pork barrel system nga gideklarar nga unconstitutional sa Supreme Court kaniadtong 2013.
Adunay upat ka hugna ang national budget process: preparation, authorization, implementation ug accountability. Samtang, sa authorization stage pa mosulod ang Kongreso aron susihon ug usbon ang proposed budget.
Gibutyag ni Lacson nga adunay giingong mensahe si Cabral ngadto sa staff ni Senate President Vicente “Tito” Sotto III nga naghisgot og ₱500 million nga “allocable.”
Hinuon, wala niya giklaro kung final appropriation, proposed allocation o partikular nga proyekto ang maong kantidad.
Gipunto niini nga dili dayon kini nagpasabot nga adunay korapsyon kung adunay allocable, apan mahimo kini nga pultahan sa anomalya kung dili husto ang proseso ug sobra kadako ang kantidad.
