Patay ang 11 ka tawo human nahitabo ang avalanche sa Mount Mizhirgi nga nahimutang sa Kabardino-Balkaria region sa North Caucasus sa Russia. Gikonsidera nga usa sa pinakataas nga bukid sa Russia ang Mount Mizhirgi, diin mokabat sa 33 ka climbers ang naapektuhan sa maong insidente.
Samtang, luwas usab nga nakanaog gikan sa bukid ang 10 ka climbers, apan wala pa matino ang kahimtang sa unom pa ka kauban. Dugang pa, kapin 50 ka emergency workers ang nagtinabangay sa pagpangita ug pagluwas sa mga posibleng natanggong o nawala sa maong lugar.
Sumala pa, nakasinati og kalisod ang mga rescuer tungod sa lisod nga kahimtang sa lugar ug sa hulga nga mahimong mahitabo pag-usab ang avalanche.
Sa kasamtangan, nagpadayon ang search and rescue operations samtang gipaningkamotan usab sa mga awtoridad ang tanang paagi aron masuta ang kahimtang sa mga wala pa makanaog gikan sa bukid.
Kahinumduman, ang Mount Mizhirgi nahimutang sa Kabardino-Balkaria region sa North Caucasus sa Russia, diin kasagarang mag-atubang og lisod nga kondisyon ang mga climbers tungod sa kabukiran ug kahimtang sa panahon.
