Gilaoman sa Bangko Sentral ng Pilipinas (BSP) nga mosaka ngadto sa 7.1 hangtod 8.1 porsiyento ang inflation rate sa nasud karong Oktubre, tungod sa pagmahal sa petrolyo, singil sa kuryente ug pamasahe.
Sa pahayag nga gipagawas niadtong Biyernes, Oktubre 30, gipasabot sa BSP nga posibleng mopataas sa inflation ang pagsaka sa presyo sa nag-unang mga palaliton ug serbisyo. Apan, mahimong mopahinay niini ang pagkunhod sa presyo sa mga produktong agrikultural sama sa utanon, karne, bugas ug isda tungod sa igo nga suplay.
Samtang, padayon nga bantayan sa BSP ang mga datos sa ekonomiya, ilabi na ang inflation ug gipaabot nga pagtubo sa ekonomiya sa nasud. Susihon usab niini ang posibleng epekto sa mga bag-ong panghitabo sa Middle East sa presyo sa mga palaliton ug sa ekonomiya sa Pilipinas.
Nakahinundom nga miabot sa 7.2 porsiyento ang inflation rate niadtong Septiyembre. Kon mosaka kini ngadto sa 8.1 porsiyento karong Oktubre, mahimong pinakataas kini sulod sa hapit tulo ka tuig, sukad natala ang 8.6 porsiyento niadtong Pebrero 2023.
Gikatakdang ipagawas sa Philippine Statistics Authority ang opisyal nga inflation data alang sa Oktubre sa Nobyembre 5.
