Nakadawat og cash assistance ang 1,054 ka rice ug corn farmers sa Island Garden City of Samal gikan sa Department of Agriculture XI ug lokal nga pangagamhanan.
Gipanghatag ang tabang kagahapon sa Brgy. Cawag Gymnasium isip kabahin sa Presidential Assistance for Farmers and Fisherfolks Program kon PAFFP.
Sa kinatibuk-ang benepisyaryo, 172 ang mga mag-uuma og humay samtang 882 ang mga mag-uuma og mais gikan sa nagkadaiyang barangay sa siyudad.
Matag usa kanila nakadawat og P2,325 nga tabang pinansiyal.
Gipaabot nga magamit sa mga mag-uuma ang maong kantidad aron madugangan ang ilang kapital ug matabangan sa adlaw-adlaw nga gasto sa pagpananom ug pag-atiman sa ilang uma.
Kabahin ang maong programa sa padayong suporta sa gobyerno sa sektor sa agrikultura, ilabina sa gagmay nga mag-uuma nga direktang naapektuhan sa pagsaka sa presyo sa farm inputs ug uban pang gasto sa produksyon.
Padayon usab ang paghatag sa DA XI ug LGU Samal og suporta sa mga mag-uuma aron mapalig-on ang produksyon sa humay ug mais sa isla. | VIA BOMBO EROS PAJOTA
