Naputlan og suplay sa kuryente ang daghang bahin sa Cuba human mi-collapse ang national electric grid niadtong Lunes sa udto, nga nakaapekto sa gibanabanang kapin 10 milyon ka mga residente. Sumala pa sa Cuban grid operator nga UNE, kalit nga mi-collapse ang tibuok electrical system sa nasud, hinungdan sa pagkawala sa suplay sa kuryente sa nagkalain-laing bahin sa Cuba.
Dugang pa niini, padayon pang giimbestigahan sa mga otoridad ang hinungdan sa maong total blackout. Matud pa nga dugay nang giatubang sa Cuba ang balik-balik nga pagkawala sa suplay sa kuryente tungod sa daan nang power infrastructure ug kakulang sa suplay sa gasolina alang sa mga planta sa kuryente.
Sa kasamtangan, milyon-milyong mga Cubano ang padayon nga nag-antos sa maong power outage, ilabina tungod sa taas nga temperatura ug sa kalisod sa pagpadayon sa ilang adlaw-adlaw nga panginabuhi, lakip ang pagtrabaho, pag-eskwela ug uban pang batakang kalihokan.
Kahinumduman, sa milabay’ng mga bulan, balik-balik nang nakasinati ang Cuba og mga brownout nga molungtad gikan sa pipila ka oras hangtod sa pipila ka adlaw, tungod sa nagkadaot nga kahimtang sa power system ug padayon nga kakulang sa suplay sa enerhiya.
