Gipunting ni Ukrainian President Volodymyr Zelensky nga posibleng magpadala ang North Korea og dugang 30,000 hangtod 50,000 ka sundalo ngadto sa Russia aron mosuporta sa gubat niini batok sa Ukraine.
Gibutyag ni Zelensky ang maong impormasyon sa iyang pahayag sa X, diin iyang giingon nga sa sinugdanan ginagmay ra ang presensya sa mga sundalong North Korean sa teritoryo sa Russia, apan misaka kini gikan sa gatosan ngadto sa liboan, ug karon gilauman nga moabot sa 30,000 hangtod 50,000.
Sumala pa kaniya, makabenepisyo usab ang North Korea pinaagi sa pag-angkon og kasinatian sa modernong pakiggubat, pagkuha og mga lisensya gikan sa Russia ug pag-angkon og nagkalain-laing kagamitan militar.
Dugang pa niini, nanawagan si Zelensky sa mas hugot nga kooperasyon tali sa Ukraine ug South Korea, ilabina sa suporta alang sa air defense systems, drones ug uban pang kagamitan pangdepensa.
Kahinumduman nga human mipirma sila Russian President Vladimir Putin ug North Korean leader Kim Jong-un og mutual defense pact niadtong Hunyo 2024, gituohang nakapadala na ang Pyongyang og mga 20,000 ka combat troops ug military engineers ngadto sa Kursk region aron mosuporta sa Moscow.
Sa kasamtangan, padayon ang pagmonitor sa Ukraine sa posibleng dugang nga pag-deploy sa mga sundalong North Korean samtang nagpadayon ang gubat tali sa Russia ug Ukraine.
