Mosabak pag-usab sa ibabaw sa ring ang wala pa mapildi nga Filipino boxer nga si Weljon Mindoro karong Agosto 29, 2026, diin makigsangka kini batok sa beteranong Mexican boxer nga si Carlos Ocampo sa Los Angeles, California. Sumala pa, dakong pagsulay kini sa karera ni Mindoro tungod kay makaatbang niya ang usa sa labing eksperyensiyadong mga boksingero sa middleweight division.
Target usab ni Mindoro nga mapalig-on pa ang iyang kampanya sa maong dibisyon pinaagi sa non-title bout nga ipasalida nga live sa mainstream television.Sa pagkakaron, nagpabilin nga walay kapildihan si Mindoro uban sa rekord nga 17 ka kadaugan, usa ka tabla, ug walay kapildihan, diin 16 niini pinaagi sa knockout, nga nagpalig-on sa iyang baruganan isip usa sa mga nagsubang nga boksingero sa Pilipinas.
Kahinumduman nga sa iyang miaging away niadtong Hunyo, napildi ni Mindoro pinaagi sa unanimous decision ang Mexican boxer nga si Elias Espadas, nga maoy nagtapos sa iyang sunod-sunod nga 16 ka knockout victories. Dugang pa niini, giila si Ocampo isip usa ka batid ug eksperyensiyadong boksingero nga adunay rekord nga 38 ka kadaugan ug upat ka kapildihan, diin 26 sa iyang mga kadaugan pinaagi sa knockout.
Lakip usab sa mga nakaatubang ni Ocampo ang pipila sa labing iladong mga ngalan sa world boxing sama nila Errol Spence Jr., Tim Tszyu, ug Sebastian Fundora, nga nagpakita sa iyang halapad nga kasinatian sa internasyonal nga entablado.Samtang, naglaom ang kampo ni Mindoro nga ang maong away mahimong dakong lakang aron mas mapalig-on ang iyang kampanya ug makaduol sa posibilidad sa pagpakig-away alang sa world title sa umaabot.
Sa kasamtangan, si Mindoro usab ang naghupot sa IBA Asian Middleweight title, nga iyang nabatunan niadtong 2024 human mapukan ang Australian boxer nga si Joel Camilleri sa Dubai
