Gipasabot ni Atty. Michael Poa, tigpamaba sa defense team ni Bise Presidente Sara Duterte, nga dili tinuod ang paghulagway kang VP Sara isip usa ka lider nga bayolente. Sumala pa ni Poa, tumong sa depensa nga ipakita nga lahi ang tinuod nga kinaiya sa bise presidente kumpara sa hulagway nga gipakita sa prosekusyon atol sa impeachment trial. Dugang pa niini, gilimod ni Poa ang alegasyon nga gilabayan kuno siya og laptop ni VP Sara, ug miingon nga dili gayud kini tinuod.
Matud ni Poa, nga kauban na niya si VP Sara sukad pa niadtong 2022, wala gayud siya makasinati nga gipataas niini ang tingog o mihimo og bayolenteng lihok batok kaniya. Gihulagway niya si VP Sara isip usa ka lider nga determinado ug kabalo sa iyang gusto, apan wala siya makakita og bayolente nga reaksyon gikan sa bise presidente.
Kahinumduman nga gihisgutan usab sa depensa ang pahayag ni VP Sara bahin sa “bloodbath,” diin ilang gipatin-aw nga usa lamang kini ka pasumbingay ug dili hulga sa pisikal nga bayolente. Samtang, may kalabutan sa video niadtong 2011 diin makita si VP Sara nga misumbag og sheriff sa Davao, gipatin-aw ni Poa nga nahitabo kini atol sa demolisyon human sa pagbaha ug wala pa siya nahimong impeachable officer niadtong panahona.
Sa kasamtangan, giinsistir sa depensa nga ang giingong “pattern of violence” sa prosekusyon dili mao ang tinuod nga kinaiya ni VP Sara nga nasaksihan sa iyang mga kauban.
