Gitawag ni Vice President Sara Duterte ang mga pag-ataki batok sa iyang igsuon nga si Davao city 1st distict Rep. Paolo Duterte ug sa iyahang bana nga si Mans Carpio isip political harassment ug political attacks.
Matod pa sa Bise Presidente nga sukad mipahawa kini sa kabinete ni Pangulong Ferdinand Marcos Jr. niadtong milabay nga bulan, nanggawas na ang nahisgutang isyu.
Naglaum na lamang ang ikaduhang Pangulo nga dili magpadala ang katawhan sa kasaba ug mas maayong tutukan ang tinuod nga problema sa nasud mahitungod sa kalisod ug mahal nga presyo sa mga pagkaon.
Gihimo sa Bise Presidente ang nahisgutang pahayag homan sa gihimong pagdungog sa gimugnang Quad committee panel sa House of Representatives, kung diin nahimong sentro sa imbestigasyon ang mga krimen nga adunay kalabutan sa kontrobersyal nga POGO, EJK ug illegal drug trade ubos sa nakalabayng Duterte administration.
Ginganlan sa testigo nga kanhi Customs Intelligence agent nga si Jimmy Guban ang bana ni VP Sara nga si Mans Carpio ug ang igsuon niini nga si Cong. Pulong ug kanhi presidential economic adviser Michael Yang sa smuggling o pagpalusot sa P11 billion nga kantidad sa shabu sa Manila International Container Port niadtong tuig 2018.
Samtang gibaliwala usab sa Bise Presidente ang matod pa gilutong impeachment complaint batok sa iyaha.
Matod pa niini, wala na kini nakurat gumikan kay mainit karon ang pulitika ug subay sa iyahang higala sa kamara, kanunay na kuno kining ginahisgutan sa mga miyembro sa lower house.
