Gipatin-aw ni Bise Presidente Sara Duterte nga wala siyay personal nga away o panagbangi batok kang Pangulong Ferdinand Marcos Jr., apan nagpabilin ang iyang pagsupak sa pamaagi sa pagdumala sa administrasyon.
Sa usa ka interbyu sa The Hague, giingon ni VP Sara nga ang iyang mga komento nakabase sa iyang pagtimbang-timbang sa pagdumala sa Presidente isip lider sa nasod, ug dili tungod sa iyang personalidad.
“Wala akong problema sa kanya bilang tao. Ang problema ko sa kanya bilang presidente. Wala kaming alitan na personal na dalawa. Baka para sa kanya, meron. Pero para sa akin wala,” matud ni Duterte.
Sumala sa Bise Presidente, wala siyay personal nga kasuko kang Marcos Jr., ug ang tanan niyang mga pahayag batok sa administrasyon kabahin lamang sa iyang katungod sa pagpahayag sa iyang opinyon.
Kahinumdoman nga nagtinabangay sila Marcos ug Duterte sa eleksyon niadtong 2022 isip presidente ug bise presidente.
Apan sa ulahi, nabugnaw ang ilang relasyon sa politika nga misangpot sa pagbiya ni Duterte isip Kalihim sa Department of Education.
Samtang, nagpadayon ang impeachment trial batok kang Duterte.
Lakip sa mga isyu nga gihisgutan sa reklamo mao ang iyang pahayag sa usa ka online press conference diin iyang giingon nga nakigsulti siya sa usa ka tawo nga mopatay kuno sa Presidente, sa First Lady, ug kang kanhi House Speaker Martin Romualdez kung adunay mahitabo nga daotan kaniya.
