Adunay hangtod alas-7 sa gabii na lamang karong adlawa si Sara Duterte aron isumite ang iyang pormal nga tubag sa Articles of Impeachment nga gisang-at batok kaniya.
Sa gipagawas nga pahibalo sa Senate of the Philippines, giingon ni Senate Sec.Jose Luis Montales nga mahimong isumite sa Bise Presidente ang iyang tubag sugod alas-8 sa buntag hangtod alas-7 sa gabii, personal man o pinaagi sa email.
Isip pagpangandam sa posibleng personal nga pagsumite sa dokumento, gilimitahan sa Senado ang pagsulod sa pipila ka bahin sa gusali aron malikayan ang kagubot ug pagdagsa sa mga miyembro sa media.
Sumala sa advisory, ang mga awtorisadong opisyal lamang sa impeachment court ug mga miyembro sa legal team sa Bise Presidente ang tugotan nga makasulod sa Office of the Senate Secretary sa ikaunom nga andana diin dawaton ug prosesoon ang maong dokumento.
Gipasabot usab sa Senado nga gikinahanglan ang maong lakang tungod sa limitadong luna sulod sa gambalay ug sa gilauman nga kadaghanon sa mga media personnel nga mo-cover sa pagsumite sa tubag ni Duterte.
Samtang kabahin niini, gisupak ni Sen. ni Alan Peter Cayetano ang mga alegasyon nga adunay kalabutan sa impeachment trial ang gisugyot nga pag-amenda sa Senate rules kabahin sa remote participation sa mga senador.
Sa laing bahin, gipasalig sa legal team ni Duterte nga makatubag sila sulod sa gitakdang deadline alang sa pagsumite sa ilang tubag sa impeachment complaint.
