Gipasidunggan ni Dabawenyo Senator Christopher “Bong” Go ang mga volunteer responders tungod sa ilang walay hunong nga serbisyo isip mga frontliners sa disaster response ug community services.
Gidayig usab niya ang ilang dedikasyon ug ang dakong papel nga ilang ginahimo sa panahon sa mga kalamidad, emerhensiya, ug uban pang public service nga nagpakita sa tinuod nga diwa sa “malasakit.” Giapil kini nga pag-ila atol sa ika-34 nga National Convention sa Radio Emergency Communication Operation Network Incorporated nga gipahigayon sa Agdao Public Market Convention Hall.
Gipakita sa gatusan ka mga volunteer nga nanambong gikan sa nagkalain-laing parte sa nasud ang ilang lig-on nga paningkamot ug padayon nga commitment sa pagpalig-on sa emergency communication system.Gipasiugda sa maong kalihukan ang kahinungdanon sa koordinasyon, kahandaan, ug episyenteng komunikasyon aron mas mapaspas ang pagresponde sa mga emerhensiya ug kalamidad.
Dugang pa niini, giila usab ang papel sa mga volunteer responders isip kasaligan nga katuwang sa gobyerno sa pagluwas og kinabuhi ug paghatag og agarang serbisyo panahon sa krisis.Sa kasamtangan, gilauman nga pinaagi sa padayon nga suporta, pagbansay, ug kolaborasyon sa gobyerno ug volunteer groups, mas molig-on pa ang sistema sa disaster response sa nasud ug mas maprotektahan ang katawhan ug ilang kabtangan.
