Palapdon sa U.S. State Department ang pagsusi sa ilang social media account sa mga langyaw nga mamamahayag nga nag-aplay og visa aron makatrabaho sa Estados Unidos.
Kabahin kini sa gipalapdan nga polisiya sa administrasyon ni U.S. President Donald Trump sukad pagsugod sa iyang ikaduhang termino niadtong Enero 2025.
Kinahanglan usab nga himuong publiko sa mga aplikante ang ilang social media account aron masusi kini sa mga opisyal sa Estados Unidos.
Sama usab nga screening ang ipatuman sa mga aplikante alang sa pipila ka work visa sa mga trabahante gikan sa Canada ug Mexico.
Bisan wala gikumpirma sa U.S. State Department ang sulod sa internal memo, giingon niini nga gigamit ang gitawag nga “online presence vetting” aron masiguro nga kwalipikado ang mga aplikante ubos sa balaod sa Amerika ug dili hulga sa nasudnong seguridad, kaluwasan sa publiko, o interes sa nasud.
Sumala pa sa ahensya, naggamit ang mga opisyal sa visa og nagkalain-laing pamaagi sa pagsusi sa mga aplikasyon aron malikayan ang pagpanglimbong ug mapanalipdan ang seguridad sa nasud.
Wala pa klaro kung kanus-a ipatuman ang gipalapdan nga polisiya.
Niaging bulan, naghugot usab ang Department of Homeland Security (DHS) sa mga lagda kabahin sa pagpabilin sa mga langyaw nga mamamahayag, international students, ug uban pang adunay visa sa Estados Unidos.
Tungod niini, nagpahayag og kabalaka ang pipila ka civil liberties advocates nga miingon nga posibleng maapektuhan ang kagawasan sa pagpahayag.
Una nang giingon sa U.S. Citizenship and Immigration Services (USCIS) nga gisusi usab niini ang mga post sa social media sa mga immigrant ug visa applicants, lakip ang mga giisip nga antisemitic o anti-American.
Gawas niini, gikansela usab sa administrasyon ang visa sa pipila ka langyaw nga estudyante nga nalambigit sa pro-Palestinian protests ug misulay usab sa pagpapa-deport sa pipila kanila.
