Gibarugan sa United States nga dili kontrolado sa Iran ang Strait of Hormuz, samtang giingon sa US Central Command o CENTCOM nga nagpadayon ang pag-agos sa komersyal nga trapiko sa maong estratehikong agianan sa lana.
Matud ni CENTCOM spokesperson Capt. Tim Hawkins, gitabangan sa US military ang mga commercial vessel nga makabiyahe agi sa Strait of Hormuz ug nakadala og kapin 900 milyon ka barrels sa krudo ngadto sa global energy market sukad pa niadtong Mayo.
Pahayag usab ni Hawkins nga nagpadayon ang operasyon sa US aron mapadayon ang commercial shipping ug ipatuman ang blockade batok sa mga pantalan sa Iran. Kapin 100 ka barko na usab ang giingong gi-redirect tungod sa pagsulay nga makalapas sa maong blockade.
Dugang pa, nahuman na usab sa US forces ang paglimpyo sa mga mina sa giila nga primary shipping lanes, ug giingong nagpabiling bukas ang maong mga agianan.
Gipanghimakak sa CENTCOM ang alegasyon nga tinuyo nilang targeton ang mga sibilyan sa ilang mga operasyon. Matud ni Hawkins, ang US military nag-ingon nga hugot nilang gisunod ang balaod sa armed conflict ug mga pasilidad militar ang ilang target.
Apan, sumala sa shipping data nga gitaho, nagpabiling ubos sa naandang lebel ang aktuwal nga gidaghanon sa mga barkong moagi sa Strait of Hormuz.
