DAVAO CITY – Nagsugod na karong adlawa ang pagbalik sa face to face classes sa usa ka tulunghaan diri sa dakbayan sa Dabaw nga nahimutang sa Matina diin mi-resulta kini sa hilabihan ka taas nga pila sa mga estudyante.
Nasayran nga adunay pipila ka mga estudyante ang mireklamo gumikan wala matud pa sila gipasulod sa campus tungod uban kanila ang dili fully vaccinated ug wala pa gayud nabakunahan. Apan, gipaklaro ni Bebot Castillo, Admin sa University of Mindanao Matina Campus, nga gipasulod nila ang tanang mga estudyante sa unang adlaw sa ilang klase. Matud pa nga ilang ginakonsidera ang pipila ka rason nganong wala nakapabakuna ang mga estudyante diin usa niini mao ang mahitungod sa relihiyon sa pamilya kung asa naggikan ang estudyante. Ikaduha mao ang dili gayud buot sa usa ka estudyante nga magpabakuna ug ang ikatulo mao ang aduna kini gihambin nga balatian. Dugang pa ni Castillo, tanang bakunado, naka-1st dose ug unvaccinated ang gipasulod alang sa pagahimoon nga orientation sa mga polisiya sa tulonghaan alang sa new normal.
Gi-anunsyo sab sa maong admin nga adunay pagahimoong vaccination sa duha ka campus sa tulonghaan nga mao ang Matina Campus ug Bolton Campus karong umaabot nga August 24 hangtud 25,2022 nga pasiugdahan sab sa City Health Office diin tanan ang mamahimung makabenepisyo niini bisan paman dili estudyante sa maong tulonghaan. Mismong sa adlaw sa vaccination mahibal-an ang brand sa bakuna nga magdepende usab sa availability. Alang sa mga wala ug dili magpabakuna, giklaro ni Castillo nga kinahanglan sila magsumite matag semana og Antigen Negative Test Result nga pagabayaran mismo sa mga estudyante.
Ning kasamtangan, wala pa gipangayoan og antigen negative test result ang mga estudyante sa maong tulonghaan. Subay niini, nagpasalamat sab si Castillo sa oportunidad nga madungog ang ilang bahin aron mahatagan og katin-awan ang tanang estudyante ug mga ginikanan niini.
Via || DANICA BAGUIO
