DAVAO CITY – Mikabat na sa 74 gikan sa 261 nga natalang kaso sa diarrhea outbreak sa Toril ning dakbayan sa Davao ang hingpit nang naka-recover.
Kini mismo ang gikumpirma ni Davao City Acting City Health Office Dr. Ashley Lopez diin gibutyag niini nga 183 na lamang ang nahabiling active cases ug gikan sa maong ihap, 53 ang pabilin pang naka-admit sa ospital ug 104 ang mga outpatient.
Samtang padayon pang gina-verify ang lain pang 26 ka mga kaso aron masuta kung aduna ba kini kalambigitan sa diarrhea outbreak sa Toril.
Dugang pa ni Lopez nga ang mga pasyente ang anaa sa pangidaron nga 6 hangtud 71 anyos.
Gikanayon usab sa opisyal nga sugod kagahapong adlawa, padayon nga naga-ubos ang ihap sa mga kaso nga anaa na lamang sa pito kung itandi niadtong milabay nga semana nga moabot sa 40 hangtud 50 ka mga kaso ang matala matag adlaw.
Gipanaad niini nga dili mohunong ang lokal nga panggamhanan sa paghimo og mga lakang hangtud nga matala na ang zero cases.
Samtang nagpaabot sa resulta sa laboratory tests sa pagkaon ug tubig, padayon ang CHO sa pagsuta sa mga dapit nga posibleng tinubdan sa kontaminasyon.
Nagkuha na usab sumala pa ang CHO ug water samples gikan sa usa ka tinubdan sa tubig sa Brgy. Tungkalan, Toril nga gikatahapan usab nga kontaminado ug gipadala na kini ngadto sa SPMC.
Dugang pa ni Lopez nga nakadawat usab sila og report nga pipila sa mga residente ang naga-gamit og tubig gikan sa mga deep well.
Samtang gikumpirma usab niini nga anaa na sa 4 ang namatay diin ang pinaka-ulani niini mao ang 23 anyos nga swabber sa City Health Office.
Gisuspende na usab sa CHO ang operasyon sa duha ka ice plants sa Toril human migawas sa initial test result nga adunay bacteria ang tubig nga ginahimong ice niini.
Via || LJ Florendo
