DAVAO CITY – Mipauli na ang tribal leader nga si Datu Ginamao Andil, nga alegasyong miyembro sa New People’s Army ngadto sa ilang yutang kabilin sa Sitio Tibucag, Barangay Dagohoy, Talaingod, Davao del Norte, human ang unom ka tuig nga pagtago sa UCCP Haran Compound sa Father Selga Street ning Dakbayan.
Nahimo kining posible pinaagi sa pag-awhag kaniya sa Revitalized-Pulis Sa Barangay sa Police Regional Office XI nga muhawa na sa naasoy nga pasilidad.
Subay sa report sa PRO XI, usa ka miyembro kaniadto si Datu Andil sa Salugpongan Ta’tanu Igkanogon Community Learning Center Council ug nahimong vice-chairman niadtong 1990.
Usa sab siya sa mga tribal leaders nga nakigsangka human sa wala pagkasinabtanay sa mga Indigenous Peoples ilawom sa pagdumala ni Datu Gibang Apoga ug sa mga trabahante sa logging concession nga Alcantara and Sons nga nagapahigayon og logging activities sa Talaingod.
Miapil usab siya sa armadong pakigbisog sa NPA niadtong 2002, ug human ang 12 ka tuig, mipuyo na siya sa Haran kauban ang iyang pamilya.
Nakigdayalogo na usab siya kang Davao del Norte Governor Edwin Jubahib ayha kini mipauli.
Bisan pa man malampuson ang iyang pagpauli, kaatubangon niya ang kasong gipasang-at batok kaniya pinaagi sa warrant of arrest nga gipagula niadtong Setyembre 1, 2011 ni Judge Danilo Belo, Presiding Judge sa Branch 31 sa RTC Tagum City alang sa double.
Hinuon, nagpiyansa na si Datu Andil og 120 thousand pesos alang sa temporaryo niining kaluwasan.
