DAVAO CITY – Dugay na matud pa nga gihagyo sa transport sector ngadto sa gobyerno ang 100 percent nga seating capacity sa mga pampasaherong sakyanan sanglit kadaghanan sa mga driver nalugi na sa ilang pagpamasada.
Kini ang gibutyag ni Mody Floranda, National president sa grupong Piston gumikan sa nagkadaiyang suliran nga gi-atubang karon sa mga driver sa pampasaherong sakyanan partikular na ang padayon nga pagsaka sa presyo sa gasolina.
Sumala pa kang Floranda nga angay lamang nga ibalik na sa normal ang kapasidad ang pagpasakay ug mga pasahero sa mga PUVs ilabi na sa mga lugar nga gipailalom sa alert level 3 kini aron nga makabawi ang mga nahisgutan sa sobra nga pagsaka sa presyo sa gasolina ug aron makatabang ang transport sector sa hinay-hinay nga pagbangon sa ekonomiya sa nasod nga grabeng naapektohan sa covid-19 pandemic.
Bisan tuod nga katungod karon sa transport sector nga manawagan ug dugang singil sa pamasahe tungod sa pagsaka sa presyo sa lana, dili sumala pa nila kini ikonsidera sanglit kadaghanan sab sa mga commuters walay dugang nga singil sa ilang suweldo.
Mas maayo sumala pa nga himuon karon mao ang pagpatuman ug rollback sa presyo sa gasolina o magpatuman ug price control sa mga produktong petrolyo.
