Nanawagan ang mga grupo sa mga drayber ug operator sa public utility jeepney nga aprobahan ang hangtod P2 nga dugang pasahe, samtang nagpasidaan nga maglusad sila og nationwide transport strike kon dili matubag sa gobyerno ang ilang gihangyo. Sumala pa kang Manibela chairperson Mar Valbuena, dili igo ang gisugyot nga P1 nga dugang pasahe tungod kay wala pa mabawi sa mga drayber ug operator ang ilang kakulang nga kita sukad pa niadtong Marso.
Dugang pa niini, gipasabot ni Valbuena nga padayon nga misaka ang gasto sa operasyon sa mga sakyanan ug sa adlaw-adlaw nga panginahanglan, busa gikinahanglan ang mas taas nga adjustment sa pasahe aron mapadayon ang ilang pangkinabuhi-an. Lakip sa mipadayag og suporta sa maong panawagan si ACTO president Libay de Luna, nga miingon nga dako na usab nga tabang sa sektor sa transportasyon ang P1 o P2 nga dugang pasahe, ilabina sa nagpadayon nga pagsaka sa presyo sa mga batakang palaliton ug produktong petrolyo.
Matud pa sa duha ka transport groups, andam silang magpatuman og paghunong sa operasyon kon magpadayon ang pagsaka sa presyo sa produktong petrolyo ug dili gihapon aksyunan ang ilang hangyo sa dugang pasahe. Sa kasamtangan, gipadayag ni Valbuena nga ilang gitun-an ang posibleng petsa sa transport strike, diin gibanabana nga mokabat sa 100,000 ka drayber ug operator gikan sa nagkalain-laing bahin sa nasod ang mahimong moapil sa maong protesta.
Kahinumduman, gitakda usab nga makigpulong ang mga transport groups sa Land Transportation Franchising and Regulatory Board (LTFRB) aron hisgutan ang ilang petisyon alang sa dugang pasahe ug ang ubang mga isyung nakaapekto sa sektor sa pampublikong transportasyon.
