Gikwestyun karon sa political analyst ang alegasyon ni PBGen. Nicholas Torre III nga matud pa pagmanipula sa pipila ka mga kapulisan sa blotter reports aron nga makontrola ang crime statistics sa syudad.
Kahinumduman nga nakatampo sab kini sa dili pagsinabtanay sa maong opisyal kang Mayor Baste Duterte nga maoy hiungdan sa pagbinayloay niini og mga dili maayong pinulongan.
Sumala pa ni Political Analyst Ramon Belleno III, simple blotter reports lamang kini ug kung boot huna-hunaon dili niini mapakita ang kinatibuk-ang sitwasyon sa pagresolba sa mga kaso hilabi pa nga dili sa tanang higayon adunay mga follow up investigation ang idungag niini rason nga dili niini masabtan ang paghimo sa maong alegasyon.
Gipanghinaot na lamang ni Belleno nga inay magpokus sa susamang mga bangi ang mga opisyal, mas tagaan na lamang niini og pagtagad ang mga problema nga labing mas mahinungdanon.
