DAVAO CITY – Dungan sa gihimong hugot nga seguridad sa security cluster sa dakbayan sa Davao atol sa kasaulogan sa ika 37 nga Kadayawan Festival, sikop sa Task Force Davao ang pipila ka mga indibidwal gikan sa upat ka mga managlahing operasyon sulod lamang sa usa ka semana.
Resulta matud pa kini sa mas gipakusgan pa nga checkpoint operations sa tanang AFP-PNP Border Control Points.
Gikanayon ni Task Force Davao Commander Darren E. Comia nga sagad sa maong checkpoint apprehensions ang may kalambigitan sa iligal nga druga.
Nasayran nga gikan Agosto 17 hangtud 21, anaa sa P18,000 nga kantidad sa iligal nga druga ang na-intercept.
Niadtong Agosto 17, usa ka lalaki nga nagmaneho og motor ang naharang sa Sirawan Toril checkpoint human nga nasakpan kining naghupot og pito ka pakete sa shabu nga adunay gimbug-aton nga 1.1 grams ug street value nga P17,600.
Giila ang maong suspek nga si Arnel B. Saldariega, 37 anyos, minyo ug residente sa Purok 5, Poblacion, Sta Cruz, Davao Del Sur.
Sa pikas bahin, malampuson usab nga nasikop sa kapulisan niadtong Agosto 21 ang duha ka indibidwal gumikan sa paghupot og marijuana. Samtang sa Lasang Checkpoint sa Bunawan, usa ka Fenchi Tulabing Campos, 21 anyos, ulitawo ug residente sa Purok 4 Marapangi 2, Toril ning dakbayan ang sikop usab sa susamang adlaw.
Gikustodiya na sa otoridad ang tanang suspek ug mag-atubang og kasong paglapas sa RA 9165 o Dangerous Drugs Act of 2002.
