Gipahigayon ang nagkalain-laing orientation ug preparedness activities sa Tent City nga gitukod sa usa sa mga evacuation sites sa Barangay Nuing, Jose Abad Santos, aron mas mapalig-on ang kahandam sa mga pamilyang naapektuhan sa kusog nga linog. Human maporma ang maong Tent City, nagtinabangay ang mga camp managers, mga opisyal sa barangay ug ang Department of Social Welfare and Development (DSWD) Region 11 sa paghatag og mga impormasyon ug giya alang sa mga evacuees nga temporaryong nagpuyo sa lugar. Subay sa maong aktibidad, gipahigayon usab ang earthquake drill ug konsultasyon sa evacuation center kagahapong adlawa, Hunyo 19, aron mas mapalawom ang kahibalo sa mga residente kabahin sa hustong pamaagi sa pag-atubang sa posibleng mga aftershock ug uban pang emerhensya. Sumala sa mga otoridad, ang maong kalihokan nagtumong sa paghatag og kasiguruhan, kahibalo ug tukmang impormasyon ngadto sa mga apektadong pamilya aron masiguro ang ilang kaluwasan samtang nagpadayon ang pagpuyo sa evacuation site. Padayon nga giprayoridad sa mga awtoridad ang mga programa sa disaster preparedness ug risk awareness tungod sa nagpadayon nga mga paglinog sa lugar human sa magnitude 7.8 nga linog nga nakaapekto sa Jose Abad Santos ug sa ubang kasikbit nga komunidad.
