Gitubag ni Philippine Coast Guard spokesperson for the West Philippine Sea Rear Admiral Jay Tarriela ang mga pahayag ni Davao City Representative Paolo “Pulong” Duterte sa isyu sa West Philippine Sea.
Sa iyang social media post, gipangutana ni Tarriela nganong siya ang gipunting ni Rep. Pulong imbes nga ang China dapat gumikan sa gidala nga kahasol niini sa mga Pilipino sa West Philippine Sea. Gikwestiyon usab sa tigpamaba ang kongresista kung pabor ba kini sa China.
Dugang pa niini, gihimakak ni Tarriela ang alegasyon nga nakadawat siya og ₱10 milyon matag bulan nga ayuda ug gihangyo si Duterte nga dili magpakaylap og sayop nga impormasyon.
Matud pa ni Rep. Pulong nga mas angay unta nga gamiton ang diplomatic channels sa gobyerno sa pagdumala sa mga isyu tali sa Pilipinas ug China imbes nga pinaagi sa media interviews.Gipasabot ni Duterte nga ang iyang panawagan nga dili “i-demonize” ang China wala magpasabot nga iyang gisuportahan ang Beijing o gisurender ang soberanya sa Pilipinas sa West Philippine Sea.
Tubag ni Tarriela, nagpadayon ang diplomatic relations tali sa Pilipinas ug China, apan importante usab nga mahibal-an sa publiko ang tinuod nga kahimtang sa West Philippine Sea. Gipasiugda niya nga ang China ang naglapas sa katungod sa Pilipinas subay sa 2016 Arbitral Award ug sa United Nations Convention on the Law of the Sea (UNCLOS).
Samtang sa laing bahin, giduso sa House Young Guns ang House Bill No. 10587 o West Philippine Sea Education Act aron maapil sa curriculum sa mga eskwelahan ang edukasyon mahitungod sa West Philippine Sea. Tumong sa maong sugyot balaodnon nga mapalambo ang kahibalo sa mga estudyante kabahin sa katungod sa Pilipinas sa WPS subay sa Konstitusyon, Philippine Maritime Zones Act, UNCLOS, ug sa 2016 Arbitral Award. Lakip usab sa gisugyot nga ipahimo sa Department of Education ug Commission on Higher Education ang pag-andam og standard nga learning materials nga nakabase sa ebidensya, non-partisan, ug subay sa opisyal nga polisiya ug internasyonal nga balaod.
