DAVAO CITY – Malampusong nasikop ang usa ka lalaki human gipatay niini ang usa ka 50 anyos nga indibidwal. Gilayon girespondehan sa kapulisan human nakadawat kinig impormasyon sa maong insidente nga adunay natigayon nga krimen sa Abarca St., Brgy. Poblacion, Cateel, Davao Oriental.
Giila sa kapulisan ang suspek nga si Seias Linaza Lasquite, 57 anyos, mag-uuma ug residente sa Brgy. San Antonio, Cateel, Davao Oriental. Samtang ang biktima giila si Alex Villaruz Lim, 50 anyos, mag-uuma ug residente sa Brgy. Poblacion, Cateel, Davao Oriental.
Subay sa imbestigasyon, nagmeryenda ang biktima sa Mix Venture Pastries Snack house kauban si Arlene Aguilon Lasquite 50 anyos, residente sa Brgy. San Antonio, Cateel, Davao Oriental. Diin giduol sa suspek ang biktima nga misangpot og panaglalis ug mibunlot kini sa iyang dala nga Sundang nga maoy giduslak ngadto sa biktima igo ang dughan niini dayon paspas misibat ang suspek.
Gilayon gidala ang biktima sa Davao Oriental Provincial Hospital samtang nagpahigayon ang mga sakop sa Cateel MP og Hot pursuit operation sa bukirong bahin sa Brgy. Poblacion, Cateel, Davao Oriental diin narekober nila ang mga ebidensya nga sundang nga dunay kapin kon kulang 17 inches ang gitas-on.
Usa sa gitutokan sa motibo sa krimen mao ang personal nga kasuko o crime of passion. Sa kasamtangan, gihikay na sa kapulisan ang mga dokumento alang sa iduso nga kaso batok sa suspek.
