DAVAO CITY – Nailhan na ang suspek sa mipatay sa 29 anyos nga nailang si Shella Lagsaway Han-ay, usa ka house helper kinsa nakaplagan sa Deca Cabantian kagahapon sa buntag lamang, Hunyo 18, ning tuig.
Sa nagkalat nga video sa social media, makita nga adunay usa ka tiguwang babaye ang nagguyod og trolley nga gikatahapang karga niini ang biktima.
Giila ang maong tiguwang nga si Nenita Pagatpatan, 70-anyos ug layong gidala usab sa ospital human naglisud kini og ginhawa samtang gipailawum sa interogasyon.
Kahinumduman nga nagbuy-od ang patayng lawas sa biktima nga gitabunan og trapal. Kabahin niini, mapasalamaton ang kapulisan sa kaabtik sa katawhan nga mutimbre sa nahisgutang panghitabo.
Sa pagkakaron, anaa na sa kwerpo sa kapulisan ang suspetsado ug ginahikay na ang tukmang kaso nga atubangon niini.
