DAVAO CITY – Gibutyag sa usa ka opisyal sa Southern Philippines Medical Center (SPMC) nga uyon sila sa lakang nga hinganlan ang mga indibidwal nga positibo sa coronavirus disease (Covid-19) aron nga mapahigayon ang contact tracing dinhi sa siyudad ug ma-protektahan ang mga health workers.
Sumala pa kang SPMC chief of clinics and Health Emergency Management Bureau (HEMB) coordinator Dr. Ricardo Audan nga ang kamandoan sa national government nga hinganlan ang mga covid positive patients makatabang sa fast-track sa mga tao nga posibleng natakdan niini.
Una ng gibutyag sa Department of Health (DOH) -Regional Epidemiology Surveillance Unit-Davao nga ang contact tracing ang usa sa mga dakong hagit nga ilang gi-atubang sa kasamtangan aron nga batukan ang sakit diin ubay-ubay na ang natakbuyan.
Kahinumduman nga nahimong dako nga hisgutan ang pagbutyag sa mga pangalan sa pasyente panahon nga adunay health crisis gumikan kay mamahimo sumala pa nga makalapas sa Data Privacy Act nga nagdili sa pagpagula ug personal data sa pasyente.
Hinuon nakiglambigit na matud pa ang DOH Davao ngadto sa SPMC kalabot sa maong lakang apan sa kasamtangan wala pa nagpagula ang ahensiya ug guidelines ingon man protocols.
Gitataw sab ni Audan nga gihinabi na sab nila ang mga pasyente nga ipahibalo ang ilang personal information aron nga daking mapahigayon ang contact tracing.
