DAVAO CITY – Pakusgan pa sa dakbayan sa Davao City ang ilang pakipag-alayon sa ilang mga sister cities sa pipila ka bahin sa kalibutan.
Pinakaulahi niini ang ilang partnership sa syudad sa Sennan sa nasud Japan.
Atol sa usa sa press conference sa niaging adlaw uban ang Davao City Investment Promotion Center, gipresenta ni Sennan City Mayor Yuma Yamamoto ang ilang takus nga pakipagtambayayong uban ang Davao City sa matang sa edukasyon, turismo ug ekonomikal nga sektor.
Gilauman ni DCIPC officer-in-charge April Marie Dayap ang posibleng people to people exchange pinaagi sa student exchange program, ug information exchange alang sa mga organisasyon, kooperatiba ug ubang patigayon diri sa dakbayan.
Nauna nang nagpadayag sa ilang partnership ang Sennan, Japan niadtong 2019 apan wala kini nadayon tungod sa pandemya.
Kasamtangang ginahuwat na lamang sa Davao City International Relations Board ang mga rekisitos nga gikinahanglan aron madayon ang pakig-alayon sa duha ka syudad.
Ang Sennan City sa Japan ang usa sa pipila lamang ka mga syudad sa kalibutan nga nahimong sister city sa dakbayan sa Davao.
Uban ang Nanning ug Jinjiang sa China, Kitakyushu sa Japan, Tacoma sa Washington USA, Kaua’i sa Hawaii, Manado ug Bitung sa Indonesia, ug Koror City sa Palau.
via || Bombo LJ Florendo
