Wala pa kunoy gihimong lakang ang Senado aron masulbad ang isyu sa partisipasyon nila Senators Jinggoy Estrada ug Rodante Marcoleta sa impeachment trial batok kang Vice President Sara Duterte.
Sumala ni impeachment court spokesperson Atty. Reginald Tongol, giingon na ni Presiding Officer Francis “Chiz” Escudero nga dili ang impeachment court ang hustong forum aron hisgutan ang maong isyu, kondili ang Senado isip legislative body.
Apan, matod ni Tongol, wala pa’y bisan usa ka senador nga mihisgot sa maong isyu atol sa mga milabayng plenary session sa Senado, busa wala pa kini maaksyuni hangtod karon.
Samtang niini, gipatin-aw usab ni Tongol nga adunay duha ka kondisyon nga kinahanglang matuman una pa makabalik sa partisipasyon si Senator Jinggoy Estrada sa Senado ug sa impeachment court.
Matod niya, kinahanglan una nga mahuman ang gipataw nga 90 ka adlaw nga preventive suspension batok kang Estrada ug kinahanglan usab nga tugotan siya sa Sandiganbayan nga makapiyansa aron personal siyang makatambong sa mga sesyon sa Senado.
Gipasabot ni Tongol nga samtang nagpadayon ang preventive suspension ug wala pa siya makapiyansa, dili mahimo ni Estrada ang pagtuman sa iyang katungdanan isip senador ug dili usab siya makatambong isip senator-judge sa impeachment trial.
Sa kaso ni Senator Rodante Marcoleta, wala pa usab magpagawas og aksyon ang Senado kalabot sa iyang posibleng partisipasyon sa maong pagdungog sa impeachment case.
