Nanawagan si Senate Labor Committee Chair Joel Villanueva sa Department of Labor and Employment o DOLE nga magpatuman og temporaryong programa alang sa mga minimum wage earner samtang wala pa mahukmi sa korte ang pagpatuman sa P85 nga wage hike sa Metro Manila.
Matud ni Villanueva, dili angay nga mas maipit pa ang mga trabahante samtang giklaro ang mga legal nga isyu kalabot sa wage order, ilabina tungod sa padayon nga pagsaka sa presyo sa pagkaon ug krudo.
Giinsistir sa senador nga gikinahanglan na gayod sa mga trabahante ang dugang nga sweldo tungod kay dili na igo ang kasamtangang minimum wage alang sa desente nga panginabuhi.
Gipahayag usab ni Villanueva ang iyang suporta sa National Wages and Productivity Commission o NWPC ug sa Regional Tripartite Wages and Productivity Board-NCR sa ilang pagpangayo og angay nga remedyo ngadto sa Office of the Solicitor General.
Gipasiugda ni Villanueva nga kinahanglan magpadayon ang tripartite wage-setting mechanism nga gimugna ubos sa Republic Act No. 6727, imbis nga madugay sa proseso sa korte ang isyu sa pagtakda sa sweldo.
Matud pa sa senador, ang wage hike kinahanglan hisgutan tali sa mga trabahante, management ug gobyerno base sa aktuwal nga panginahanglan, ug dili angay malangan tungod sa taas nga proseso sa korte.
| via Bombo Ray Ann Martinez
