Giduso nila Senador JV Ejercito ug Senadora Risa Hontiveros ang paspas nga pagpasa sa Senate Bill No. 2 o Masterplan on Infrastructure and National Development (MIND) Act aron mahimong mas organisado, transparent, ug pangmalungtaron ang pagpatuman sa mga proyekto sa imprastraktura sa Pilipinas.
Matud ni Sen. Ejercito, makatabang ang maong sugyot balaodnon sa pagpaspas sa kalamboan sa nagkadaiyang rehiyon, paghimo og dugang trabaho, ug pagpugong sa mga iregularidad sa pagpili ug pagpatuman sa mga infrastructure projects.
Dugang pa niya, masiguro usab sa maong balaod nga magpadayon ang mga importanteng proyekto sa imprastraktura bisan pa og mausab ang administrasyon.
Tumong usab sa MIND Act nga tapuson ang last-minute budget insertions sa bicameral conference committee ug hatagan og mas dako nga papel ang mga lokal nga panggamhanan ug regional development councils sa pagtino sa mga prayoridad nga proyekto sa ilang mga lugar.
Samtang, giingon ni Senador Hontiveros nga importante ang pagbaton og komprehensibong masterplan aron malikayan ang mga dili kinahanglanon, mahal, ug kuwestiyonableng mga proyekto.
Matud pa niya, kon walay klarong plano, mahimong dili organisado ang paggasto sa pondo sa gobyerno ug posible nga dili matubag ang tinuod nga panginahanglan sa mga komunidad.
Ubos sa maong sugyot, maghimo usab og pangmalungtarong infrastructure plan nga mahimong giya sa gobyerno alang sa pagpili, pagpatuman, ug pagmonitor sa mga mayor nga proyekto sa tibuok nasud.
