Nanawagan pag usab si Senate Blue Ribbon Committee Chairman Erwin Tulfo alang sa paspas nga pagpasa sa gisugyot nga Masterplan for Infrastructure and National Development o MIND Act, nga nagtumong sa paghimo og komprehensibong plano alang sa mga imprastraktura sa tibuok nasod.
Wala pa maaksiyoni sa Senate Committee on Economic Affairs ang maong lakang, nga gipadayag pag-usab ni Tulfo atol sa pagsugod sa diskusyon bahin sa 2027 national budget.
Matod ni Tulfo, kinahanglan nga maangay sa usa ka pangmalungtarong plano ang mga proyekto nga ginapatuman ug gisugyot aron malikayan ang mga proyektong wala maipadayon, wala mahuman ug substandard nga mga imprastraktura.
Gipasabot sa senador nga gipadayag sa sunod-sunod nga pag-ulan ug pagbaha ang kahimtang sa mga guba nga tulay ug kalsada, lakip na ang mga proyekto nga wala nadayon bisan pa og napondohan na ang unang yugto niini.
Gibutyag usab ni Tulfo nga nag-usik sa pondo sa katawhan ang mga proyekto nga dili mapuslan sa publiko tungod sa kakulang sa maayong pagplano.
Giingon usab niya nga kinahanglan ilhon ug tapuson ang mga wala pa mahuman nga mga proyekto, samtang ang mga bag-ong gisugyot nga proyekto kinahanglan nga uyon sa mga plano hangtod sa lokal nga lebel.
Matod pa sa senador, kinahanglan nga lig-on, pangmalungtaron ug makasugakod sa grabeng kahimtang sa panahon ang mga pampublikong imprastraktura, bisan kinsa pa ang administrasyong anaa sa poder.
Una nang gipahayag ni Tulfo nga pangunahan niya ang pormal nga imbestigasyon sa Senado bahin sa mga giingong substandard nga proyekto nga napadayag tungod sa mga miaging pag-ulan ug pagbaha.
| via Bombo Ray Ann Martinez
