Gipasakahan og kaso nga korapsyon si Department of Health (DOH) Secretary Ted Herbosa ug lima ka mga opisyal sa maong ahensiya. Kini ang adunay kalabotan sa ilahang pagpalit og mental health drugs nga nagkantidad og P44.6 milyon.
Apil sa mga gi-reklamo mao sila Officer-in-Charge ug Director for Supply Chain Management Engr. Dave Masiado, DOH Medical Officer IV Dr. Carmela N. Granada, Timotei Jemma A. Rabe, Tasneem A. Amping, Erwin J. Odpoga, ug Ramon Guiang.
Base sa reklamo, gi-question ang pagpalit sa mga psychiatric medications gikan sa usa ka private civic organization nga Rotary Club of Quezon City.
Napamatud-an usab nga daghan sa mga napalit nga tambal hapit na mag-expire.
Niadtong Enero 30, nadawat ni Assistant Secretary of Health for Public Health Service Cluster ug kasamtangang Director IV Farwa M. Hombre ang mando ni Herbosa nga atubangon ang hangyo gikan sa Rotary Club.
Pagsulod sa Pebrero 11, nagpagawas og Department Order si Undersecretary of Health Achilles Gerard C. Bravo nga nag-alokar og P1,527,686 alang sa National Center for Mental Health (NCMH).
Apan sa nahimong inspeksyon, nadiskobre nga wala naghangyo ang NCMH og bisan unsang pondo.
Niadtong Abril 4, nangayo si Herbosa og psychiatric drugs alang sa usa ka medical mission nga pagahimoon sa Hunyo 17, apan wala kini maghisgot kung asa kini buhaton.
Ubay-ubay sa mga kasong gi-atubang sa mga opisyal mao ang Grave Misconduct, Conduct Prejudicial to the Best Interest of the Service, ug paglapas sa Anti-Graft Law.
Sa karon nagdumili sa pagpagawas og pahayag ang DOH pinaagi ni Dr. Albert Domingo hangtod makadawat sila og kopya sa opisyal nga reklamo gikan sa Ombudsman.
