Gikumpirma sa International Criminal Court nga kinahanglan personal nga motambong sa pagtaral si kanhing Pangulong Rodrigo Duterte kalabot sa kaso nga crimes against humanity human gikumpirma sa ICC Pre-Trial Chamber I ang mga kaso batok kaniya.
Sumala sa ICC, klaro sa Rome Statute nga ang akusado kinahanglan present sa panahon sa trial.
Matod pa sa korte, nakatambong na si Duterte sa Pre-Trial Chamber niadtong Marso 2025, apan wala na siya nitambong sa sunod nga mga pagdungog, lakip na ang confirmation of charges proceedings niadtong Pebrero.
Ubos sa ICC rules, mahimo siyang temporaryong tangtangon sa courtroom kung makasamok sa proseso, apan hatagan gihapon siya og kahigayonan nga masubay ang proceedings pinaagi sa communication technology ug makig-istorya sa iyahang abogado.
Apan gibutyag sa korte nga gamiton lamang kini sa “exceptional circumstances.”
Si Duterte anaa sa kustodiya sa ICC sukad Marso 2025 may kalabotan sa kaso sa giingong maduguong “war on drugs” sa iyang administrasyon, lakip na ang mga alegasyon sa pagpatay sa panahon nga siya pa ang mayor sa Davao City.
Una na niyang gilimod ang mga akusasyon, ug gibutyag nga siya nagpatuman lamang og polisiya batok sa illegal drugs apan dili siya direktang responsable sa matag kamatayon sa operasyon.
Sumala sa datos sa kapulisan, molapas sa 6,000 ang nakabsan sa kinabuhi sa mga anti-drug operations sa iyaha ng administrasyon.
