Gipasalig sa kampo ni kanhi Pangulong Rodrigo Duterte nga ilahang pamatud-an sa pagtaral sa International Criminal Court nga usa lamang ka “complete fiction” o hinimo-himo ang alegasyon nga adunay direktiba ang gobyerno sa pagpatay sa mga suspek ilawom sa war on drugs.
Sumala sa defense counsel nga si Nicholas Kaufman, nagasalig lamang ang kaso sa prosekusyon sa mga testigo nga giingong walay kredibilidad.
Gisaway usab niini ang desisyon sa ICC Pre-Trial Chamber I nga kumpirmahon ang mga kasong crimes against humanity, lakip na ang murder ug attempted murder batok sa kanhing pangulo.
Matod pa ni Kaufman, wala pa masusi pag-ayo sa confirmation hearings ang kredibilidad sa mga testigo sa prosekusyon.Gikwestyon usab sa depensa ang posibleng paghatag og ganti sa mga testigo, lakip ang proteksyon batok sa kaso ug paghatag og bag-ong identity gamit ang pondo sa international community.
Gibarugan sa depensa nga walay lig-on nga basehan ang mga ebidensiya nga gipresenta sa mga kritiko ni kanhing Pang.Duterte.
