Nagkanayon si Department of Public Works and Highways (DPWH) Secretary Vince Dizon nga andam siyang motabang sa imbestigasyon sa National Bureau of Investigation (NBI) sa giingong mga iregularidad sa 2019 Southeast Asian Games (SEAG).
Gipasiugda sa kalihim nga limpyo ang iyang konsensiya ug motuman siya kung magpagawas og subpoena ang NBI isip kabahin sa ilang imbestigasyon.
Matud usab ni Secretary Dizon nga nibasura na kaniadtong Disyembre 2021 ang reklamong gisang-at batok kaniya ug sa ubang mga opisyal, busa kampante siya nga walay sayop sa iyang gihimo ug nagtuo nga husto ang pagkatukod sa mga sports facilities.
Gipadayag ni Dizon ang maong pahayag atol sa inspeksiyon sa Phase 2 rehabilitation sa EDSA karong buntaga, Lunes, Hulyo 20,2026 uban sa mga miyembro sa media.
Matud pa, si Secretary Dizon kaniadto ang chairman sa Bases Conversion and Development Authority (BCDA), nga maoy nagdumala sa pagtukod sa mga sports facilities sa New Clark City.
Mibalik ang kontrobersiya sa 2019 SEAG human ipahibalo ni NBI Director Melvin Matibag nga ilang imbestigahan ang giingong mga anomaliya sa pagtukod sa maong mga sports facilities.
