Gipahagsa sa usa ka Romanian fighter jet ang usa ka Russian drone human kini giingong misulod sa airspace sa Romania, usa ka nasud nga miyembro sa NATO ug European Union. Sumala pa sa Romanian Defense Ministry, napugngan sa ilang F-16 fighter jet ang maong drone sa bahin sa Black Sea niadtong Domingo.
Dugang pa niini, gikondena sa Romania ang sunod-sunod nga paglapas sa ilang airspace nga giisip usab nga bahin sa teritoryo sa NATO. Nasayran nga kini na ang ikatulong Russian drone nga gipahagsa sa Romania sulod lamang sa tulo ka adlaw, human sa pipila ka insidente sa pagsulod sa mga drone sa maong nasod. Matud pa ni Romanian President Nicusor Dan, dili kini madawat ang balik-balik nga paglapas sa Russia sa ilang airspace ug padayon nilang ginasubay ang maong mga insidente uban sa ilang mga kaalyado.
Samtang, mipahayag ang NATO nga padayon pa nilang gisusi ang detalye sa pinakabag-ong insidente. Sumala sa mga awtoridad, luwas nga nahagsa ang drone mga 12 kilometro gikan sa baybayong lungsod sa Sulina, sulod sa territorial waters sa Romania.
Kahinumduman nga sukad nagsugod ang gubat tali sa Russia ug Ukraine, nakarekord na ang Romania og 33 ka insidente nga may kalabotan sa Russian drone attacks sa ilang airspace. Sa kasamtangan, wala pa magpagawas og opisyal nga pahayag ang Moscow kabahin sa maong insidente.
