Miretiro na sa National Basketball Association (NBA) ang “Triple-Double King” nga si Russell Westbrook human sa 18 ka season sa liga.
Gipili sa beteranong point guard ang pagretiro bisan pa og nakadawat og mga tanyag gikan sa nagkalain-laing grupo alang sa 2026-2027 season, lakip ang Sacramento Kings ug Washington Wizards.
Napili si Westbrook isip No. 4 overall pick sa 2008 NBA Draft sa kanhing Seattle SuperSonics, apan wala siya makaduwa sa Seattle human mibalhin ang prangkisa ngadto sa Oklahoma City.
Gisugdan niya didto ang iyang career ug migugol og 11 ka season sa Oklahoma City Thunder, uban nila Kevin Durant ug James Harden.
Nadala sa tulo ang Thunder ngadto sa NBA Finals niadtong 2012, apan napildi batok sa Miami Heat.
Gipabilin ni Westbrook ang iyang rekord isip career leader sa Thunder sa points, assists, rebounds ug steals.
Nakahimo usab siya og kasaysayan niadtong 2016-2017 season human mag-average og triple-double sa tibuok season, diin nakarekord og 31.6 points, 10.7 rebounds ug 10.4 assists matag duwa.
Nadaog niya tungod niini ang iyang unang Most Valuable Player o MVP award.
Nagduwa siya sa nagkalain-laing team sa katapusang pito ka season sa iyang career, lakip ang Houston Rockets, Washington Wizards, Los Angeles Lakers, Denver Nuggets ug Sacramento Kings.
Nakaduwa pa siya og 58 ka duwa alang sa Kings sa iyang katapusang season niadtong 2025-2026, diin nag-average og 15.2 points, 6.7 assists ug 5.4 rebounds.
Ikapito si Westbrook sa career assists sa kasaysayan sa NBA, samtang nagpabilin siyang rekordista sa pinakadaghan nga triple-double sa liga.
