DAVAO CITY – Gikoronahan na ang bag-ong Hiyas sa Kadayawan 2022 nga si Beauty Rose Gandarosa gikan sa tribong Maranao.
Nahimong Hiyas sa Panaghiusa ang representante sa tribong Kagan nga si Alneza Bangasin; ug ang Hiyas ng Kalambuan nga si Krezyl Joy Ungab sa tribong Bagobo Klata.
Una pa niana, gigantihan una ang mga special awards ngadto kang Beauty Rose Gandarosa isip Best in Cultural Presentation, Hiyas ng Kadayawan Pau-Pau Choice Awardee ug Hiyas ng Green Windows. Samtang nasakmit ni Alneza Bangasin ang Hiyas sa Diskarte Award.
Sa nahimong nagmadaugong tubag sa question and answer portion sa bag-ong Hiyas nga si Gandarosa mahitungod sa maayong pamaagi aron mapromotar ang diverse culture sa dakbayan, tubag niya nga matuboy sa maong pageant ang nagkadaiyang kultura ug tradisyon sa onse ka mga tribo.
Dagko sab ang pagtuo sa dalaga nga mao kini ang timailhan sa subling paghibalik sa katawhan gikan sa pandemya isip indibidwal, tribo, ug lumulupyo sa Davao City. Lakip sa korona, nakuha sab ni Gandarosa ang P100,000 cash prize.
Usa sa mga mamahimong responsibilidad sa bag-ong Hiyas sa Kadayawan ang iyang pakipagtambayayong sa Davao City Tourism Office ug uban pang ahensya sa lokal nga panggamhanan sa Davao City alang sa mga programang pang-turismo ug ingon man sa mga indigenous peoples sa dakbayan.
Nahitabo ang coronation night kagabii sa RMC Petro Gazz Arena nga gisalmutan sa gatusan ka mga manan-away human sa duha ka tuig niining pagkahunong tungod sa pandemya.
VIA || Bombo LJ Florendo
