Gipasiugda ni Prosecution Spokesperson Rep. Renee Co nga importante nga masusi pag-ayo ang mga dokumentong gisumite may kalabotan sa mga giingong anomalya nga nakita sa audit report sa Office of the Vice President ug Department of Education.
Matud ni Co, dili pa panahon karon aron maghatag dayon og konklusyon o paghukom sa mga isyu nga giatubang sa maong mga ahensya.
Gipunting niya nga angay ipadayon ang proseso aron mas maklaro ang mga detalye sulod sa audit report ug masabtan kung giunsa paggamit ug pagdokumento ang mga transaksyon nga gi-flag sa Commission on Audit.
Usa usab sa gustong tukion sa prosecution mao kung nganong daghang dokumento ang gisumite lamang human ma-flag sa COA ang pipila ka transaksyon.
Matud ni Co, ang maampingong pagsusi sa mga papeles ug ebidensya importante aron matino kung adunay iregularidad ug kung kinsa ang angay motubag niini.
Padayon karon ang pagtan-aw sa mga dokumento samtang ginahulat ang sunod nga mga development sa impeachment proceedings. | VIA BOMBO EROS PAJOTA
