Gipaniguro sa Regional Anti-Cybercrime Unit-Davao o RACU-11 nga ilang pangitaon ug tukion ang mga responsable sa sunod-sunod nga online shooting threats batok sa mga eskwelahan sa Davao Region.
Matud sa RACU-11, nakarekord na sila og labing menos 10 ka reklamo nga may kalabotan sa mga hulga batok sa mga eskwelahan.
Niadtong Agosto 11, 2026, gipahugtan ang seguridad sa Davao City National High School human makadawat kini og online shooting threat. Bisan pa niini, nagpabilin nga malinawon ug normal ang kahimtang sa eskwelahan.
Matud ni Capt. Cedric Suanco, lider sa RACU-11 Cyber Response Team, dili lugar ang social media aron maghimo og hulga nga walay silot.
Gipasabot niya nga ubos sa Republic Act 10175 o Cybercrime Prevention Act, mas bug-at ang silot kung ang krimen nahimo pinaagi sa Information and Communications Technology o ICT.
Gitan-aw usab sa RACU-11 nga posibleng hinungdan sa maong mga hulga ang pagsunod sa uso o pagpangita og atensyon online, ilabina sa mga batan-on panahon nga duol na ang dagkong school activities sama sa eksaminasyon.
Bisan pa mogamit og dummy account, giingon sa RACU-11 nga posible gihapon mailhan ang responsable pinaagi sa koordinasyon sa service providers ug mga legal nga ahensya.
Padayon ang imbestigasyon aron matino ang gigikanan sa mga hulga ug mapanubag ang mga responsable. | VIA BOMBO EROS PAJOTA
