Nagtuo ang Quad Committee sa kamara nga namakak si kanhi PCSO General Manager ug retired P/Col. Royina Garma sa pag-atubang niini sa gihimong pagdungog sa komite sa matod pa sa EJK sa kanhi administrasyong Duterte.
Aron mapamatud-an kini, gi-ukay ni Rep. Bienvenido Abante ang pagbaton ni Garma ug relasyon kang SPO4 Arthur Narsolis nga gitudlong nalambigit sa pagpatay sa tulo ka Chinese drug lord sa Davao Prison and Penal Farm (DPPF) niadtong tuig 2016.
Subay sa mga naunang pahayag sa mga testigo, si Narsolis ang nagmando sa pagpatumba o pagpatay sa tulo ka mga biktima.
Gipangutana usab ni Rep. Abante si Garma kung nasayod kini nga adunay asawa ug anak si Narsolis sa dihang nagbaton sila ug relasyon.
Pagpasabot usab ni Garma nga annulled na kini sa kanhi bana ug separated usab si Narsolis.
