Gikondena sa historical advocacy group nga Project Gunita ang pagtambong ni Senador Imee Marcos sa rally sa Iglesia Ni Cristo (INC) nga gipahigayon sa EDSA People Power Monument, diin gitawag sa grupo nga usa ka paglapas sa kasaysayan ug pag-insulto sa mga biktima sa diktadurya ni kanhi Pangulong Ferdinand Marcos Sr.
Sumala pa kang Project Gunita co-founder Karl Patrick Suyat, ang pagtambong sa senador sa maong kalihokan usa ka pag-insulto sa handumanan ni Archimedes Trajano ug sa ubang mga biktima sa giingong mga paglapas sa tawhanong katungod atol sa panahon sa Martial Law. Dugang pa niini, gipunting usab ni Suyat ang insidente niadtong 1977 diin gipatay si Trajano human kini mikuwestiyon sa pagpangulo ni Imee Marcos sa Kabataang Barangay.
Matud pa niya, midaog usab ang pamilya ni Trajano sa kasong sibil nga gisang-at batok kang Imee Marcos ug sa ubang giakusahan sa usa ka federal court sa Hawaii. Lakip sa gipadayag sa grupo, giingon nilang ang 1986 EDSA People Power Revolution nagpabiling simbolo sa pagsukol batok sa diktadurya, paglapas sa tawhanong katungod, ug korapsyon.
Giakusahan usab nila si Senador Imee nga wala pa gihapon mangayo og pasaylo sa mga giingong nahitabo niadtong maong panahon. Gisaway usab sa Project Gunita ang partisipasyon sa senador sa pelikulang “Maid in Malacañang,” nga matud pa nila kabahin sa mga paningkamot sa pag-usab sa pagsabot sa publiko sa kasaysayan sa pamilya Marcos.
Kahinumduman, migawas ang maong pahayag samtang liboan ka mga miyembro sa Iglesia Ni Cristo ang nagtapok sa EDSA People Power Monument aron ipakita ang ilang suporta kang Senador Rodante Marcoleta.
