Posibleng mosaka og ₱9.50 hangtod ₱10.50 matag litro ang presyo sa diesel sa sunod semana, nga magdugang og kabug-at sa gasto sa mga motorista ug konsumidor.
Gipaabot usab nga mosaka og ₱3.50 hangtod ₱4.50 matag litro ang presyo sa gasolina. Matud sa source, ang nag-unang hinungdan sa gilauman nga oil price hike mao ang miiskalar pag-usab nga tensyon sa Tungag Sidlakan.
Lakip niini ang mga pag-atake sa Iran batok sa mga commercial ship nga moagi sa Strait of Hormuz ug ang mga gihimong pagbalos sa Estados Unidos batok sa mga military asset sa Iran.
Nakaapekto usab sa presyo sa lana ang kabalaka sa posibleng pagkalangan sa suplay, pagkunhod sa dagan sa mga barko nga moagi sa Strait of Hormuz, ug pagminus sa Russia sa eksport sa diesel.
Samtang, gipahibalo ni Pangulong Ferdinand Marcos Jr. ang pagpalapad sa United Package for Livelihoods, Industry, Food, and Transport (UPLIFT) Program aron makatabang sa mga pamilyang maapektuhan sa pagsaka sa presyo sa lana.
Ubos sa programa, gibanabana nga 7.5 milyon ug 500,000 ka mga kabalayan, o kapin 37.5 milyon ka mga Pilipino sa tibuok nasod, ang makadawat og pinansyal nga tabang.
Lakip sa mga benepisyaryo ang 3.5 milyon ka miyembro sa Pantawid Pamilyang Pilipino Program (4Ps) ug Walang Gutom Program, nga makadawat og usa ka higayon nga ayuda nga moabot sa ₱2,000.
